Parandalohet vrasja në Sarandë/ 37-vjeçari kapet me armë, kërcënonte 19-vjeçarin

0
175

Policia e Sarandës ka parandaluar një ngjarje të rëndë që mund të përshkallëzohej pas përdorimit të armës së zjarrit.

Policia bën të ditur se roja i një objekti në Sarandë është konfliktuar me një 19-vjeçar, fillimisht me fjalë e më pas ka degjeneruar në përleshje fizike.

Por teksa u dërguan në spital për mjekim nga plagët e konfrontimit, roja ka thirrur 37-vjeçarin Kristi Çakalli, i cili  ka shkuar menjëherë në spital me një pistoletë me vete.

Në këtë moment policia ka ndërhyrë pasi kishte informacion për ngjarjen, e ndonëse 37-vjeçari ka hedhur pistoletën dhe ka tentuar të largohet, ai është vënë në pranga nga policia.

Njoftimi i policisë:

Ndërhyrja në kohë e shërbimeve të Policisë ka parandaluar përshkallëzimin e mëtejshëm të një konflikti me pasoja për jetën. 

Vihet në pranga një 37-vjeçar që lëvizte me armë zjarri me vete.

Sekuestrohet arma e zjarrit pistoletë.

Nga strukturat e Komisariatit të Policisë Sarandë, falë ndërhyrjes së shpejtë është bërë i mundur parandalimi i përshkallëzimit të mëtejshëm të një konfliktit mes dy shtetasve. Më datë 11.08.2021, është marrë njoftim se dy shtetas kishin pasur një konflikt verbal e më pas fizik.

Nga hetimet e shpejta paraprake rezultoi se shtetasi H. F., që punonte roje në një subjekt, ishte konfliktuar verbalisht e më pas fizikisht, për motive të dobëta, me një 19-vjeçar. Pasi janë dërguar në spital, për mjekim, në ambientet e jashtme të spitalit është afruar shtetasi K. Ç., i cili ishte thirrur nga shtetasi H. F., për të vijuar konfliktin.  

Falë informacioneve të marra në kohë nga Policia se shtetasi K. Ç. kishte shkuar te spitali dhe me vete mbante një armë zjarri pistoletë, shërbimet e Komisariatit të Policisë Sarandë dhe Forca e Posaçme “Shqiponja”, kanë ndërhyrë profesionalisht në kohë, duke bërë të mundur kapjen dhe prangosjen e shtetasit K. Ç., 37 vjeç, banues në Tiranë, i cili kur ka parë shërbimet e Policisë ka tentuar të largohet dhe ka hedhur në tokë armën e zjarrit.     

Gjithashtu, në vijim të veprimeve  u procedua në gjendje të lirë shtetasi H. F., 58 vjeç, banues në Sarandë, për veprën penale “Dëmtime të tjera me dashje’’ ndaj 19-vjeçarit N. P.

Materialet procedurale i kaluan Prokurorisë pranë Gjykatës së Shkallës së Parë Sarandë, për veprime të mëtejshme hetimore.

LEAVE A REPLY

Please enter your comment!
Please enter your name here