Punëtorët shqiptarë nuk janë lejuar përsëri të kalojnë sot sërish drejt Malit të Zi. Si punëtorë ditorë, atyre iu kërkohet të bëjnë teste për Covid, të cilat ata thonë se i kanë bërë në Shkodër por Dogana nuk i pranon.
Prej orës 05.00 të mëngjesit të sotëm punëtorët shqiptarë ndodhen në pritje në Doganën e Hanit të Hotit. Kjo është dita e dytë që ata nuk mund të shkojnë të punojnë.
Ata ndalohen nga policia shqiptare dhe ajo malazeze me justifikimin se përgjigjet e tamponeve janë fallso. Edhe punëtorët me pasaportën e vaksinimit nuk lejohen të kalojnë. Punëtorët janë shprehur se u kërkohet çdo ditë testi i cili kushton përafërsisht aq sa ata paguhen në ditë.
Drejt Malit të Zi kalohet me certifikatë vaksinimi ose test negativ, i cili në Han të Hotit kushton 23 euro.
Që në momentin që masat e mësipërme janë futur në fuqi, qytetarët kanë shfaqur revolta të cilat kanë përshkallëzuar deri në protesta. Ditën e djeshme u desh ndërhyrja e policisë e cila shoqëroi një person në komisariat.