Targat, Kurti: Tani fillon epoka kur Serbia mësohet me reciprocitet

Pas arritjes së marrëveshjes për reciprocitetin e targave mes Kosovës dhe Serbisë sot në Bruksel ka ardhur një reagim edhe nga kryeministri i Kosovës, Albin Kurti.

Me anë të një postimi në Facebook, Kurti shkruan se meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë.

Më tej ai shprehet se tani fillon epoka kur Serbia mësohet me reciprocitet, ndërsa shton se “policia jonë kufitare në vijim do të zbatojë reciprocitetin e targave”.

Reciprociteti i targave të automjeteve është vendosur. Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë. Njësia Speciale e Policisë së Kosovës ka shkuar në Jarinjë dhe Bërnjak më 20 shtator për të mbrojtur vendkalimet dhe policinë kufitare nga bllokuesit e rrugëve dhe qarkullimit të lirë. Meqë ata do të largohen, njësia jonë speciale nuk ka pse qëndron atje, dhe mbetet gjithnjë e gatshme për ndërhyrje në çfarëdo cenimi të njëjtë apo të ngjashëm në të ardhmen. Natyrisht, policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt. Në javën e shkuar, Presidenti i Serbisë vuri katër kushte për takimin në Bruksel të përfaqësuesve tanë. Natyrisht që nuk ju plotësuan ato dhe dje u zhvilluan bisedimet në Bruksel. Tani fillon epoka kur Serbia nis e mësohet me reciprocitet.

SHPËRNDAJE

Shkruaj nje koment