Tërhiqet Kokalari: Kam vendosur të distancohem nga politika në Shqipëri

Aktivistja, Evi Kokalari, të cilën kohët e fundit ishte krah ish-kryeministrit Sali Berisha thuajse në të gjitha “Foltoret” e mbajtura, ka vendosur të tërhiqet nga skena politike në Shqipëri, duke iu rikthyer jetës në Shtetet e Bashkuara të Amerikës.

Kokalari, këtë vendim e ka ndarë me ndjekësit e saj në rrjete sociale ku thekson se do të vijojë të jetë në komunikim me anëtarët e Komisionit të Rithemelimit, por jo aq aktive sa më parë.

 “Kam vendosur të distancohem pak nga politika në Shqipëri. Megjithëse me mëndje dhe zemër jam aty ku vazhdon lufta për një opozitë të fortë, dua t’i kthehem jetës time në Amerikë që kam që në Shtator që e kam lënë komplet mbas dore. Do vazhdoj të jem në komunikim të vazhdueshëm me anëtarët e Komisionit të Rithemelimit, gjithsesi jo më aq aktive sa më parë. Me gjithë sulmet e katër muajve të fundit, një gjë është e padiskutueshme – miqësitë që kam krijuar në Tiranë vërtet më kanë ngrohur zemrën, dhe jo vetëm, mbështetjen që kam marrë nga njerëzit që kam takuar çdo ditë në rrugët e Tiranës dhe gjatë foltoreve, vërtet i kanë dhënë kuptim sakrificës së muajve të fundit. Bashkatdhetarëve të mi në Diasporë; dua t’ju them që populli ynë është i varfër, kështu që angazhohuni seriozisht se kanë vërtet nevojë për ndihmë. Lërini mërite dhe urrejtjen e së kaluarës dhe mbështesni ata që po luftojnë për ditë për të shpëtuar pluralizmin. Ndërkohë do vazhdoj të komunikoj opinionet e mia nëpërmjet medias sociale. Duke ju falënderuar të gjithëve për mbështetjen tuaj, Përzemërsisht, Evi.”

SHPËRNDAJE

Shkruaj nje koment