Një afgan vihet në pranga teksa kërkonte të kalonte me një pasaportë false lituaneze drejt Greqisë. Ngjarja është shënuar në orët e para të së dielës në Pikën e Kontrollit Kufitar në Kakavije. Navid Momen 29 vjec nga Kabuli, ishte duke udhëtuar në drejtim të Athinës nëpërmjet autobuzit të një shoqërie të transportit të udhëtarëve nga Tirana. Kontrollorët e pasaportave në Kakavije, kanë dyshuar për vërtetësinë e identitetit të afganit në pasaportën lituaneze. Menjëherë kontrollorët kufitarë, pas dyshimit, e kanë mbajtur disa minuta në pritje afganin deri në vërtetimin e dokumentacionit. Me këtë rast, ndaj tij, u ushtrua një kontroll i rreptë fizik si dhe në cantën që ai mbante. Pas kontrollit të ushtruar, policët kanë arritur të zbulonin një sasi të vogël narkotike e llojit hashash që afgani u justifikua se e kishte për përdorim vetjak. Mirëpo sasia e kalonte peshën për përdorim vetjak dhe kësisoj i’u konfiskua në cilësinë e provës materiale. Policia menjëherë ka arrestuar afganin për falsifikim të dokumentave dhe për prodhim dhe shitje të lëndëve narkotike. Materialet i kaluan Prokurorisë së Gjirokastrës për veprime të mëtejshme.
