Dy deputetët e opozitës parlamentare tërheqin firmat për ndryshim sistemi

0
128

Dy deputetë të opozitës parlamentare kanë tërhequr firmat nga dokumenti për amendim të Kushtetutës, që ndryshon sistemin zgjedhor.
Deputetët Artur Roshi dhe Besnik Troplini kanë njoftuar se, në kushtet e pasigurisë si do të bëhet ndërhyrja në Kushtetutë, ata nuk i qëndrojnë më firmave të tyre. Ndërkohë, një qëndrim surprizë nga ardhur nga radhët e socialistëve.
Opozita parlamentare rrezikon të mos e çojë deri në fund kërkesën e saj për të ndryshuar Kushtetutën, në nenet që sanksionon sistemin zgjedhor.
Disa orë pasi kjo kërkesë me 29 firma është depozituar në Kuvend, firmëtarët që kërkojnë lista të hapura por dhe ndalim të koalicioneve parazgjedhore, kanë vendosur të heqin dorë.
Kreu i Partisë “Balli Kombëtar Demokrat”, Artur Roshi ka njoftuar tërheqjen e firmës së tij dhe të deputetit Besnik Troplini për ndryshimin e Kushtetutës. Tërheqja e firmave, siç thotë Roshi, bëhet në kushtet e pasigurisë se si do të preket Kushtetuta.
“Anonçimi në media se do ndërhyhet në Kushtetutë për të ndaluar koalicionet parazgjedhore dhe vendosja e pragut 5% është shqetësuese sepse tregon se dikush është i interesuar. Këtë interes mund ta shfaqi ai që sheh se i afrohet mundësisë dhe fuqisë së kartonit për ta bërë këtë”, shprehet ai.
Deri më tani mazhoranca, e vetë kryeministri Edi Rama, është shprehur kundër listave të hapura. Gjatë debateve për listat, së fundmi kryesocialisti Edi Rama, është shprehur se ata që mendojnë se hapja e listave është një mundësi transformimi, e kanë ide të gabuar. Kjo me argumentin se për të dyja llojet e listave vendos kryetari i partisë.

LEAVE A REPLY

Please enter your comment!
Please enter your name here