Shqipëria, së bashku me Bosnje Hercegovinën dhe Ukrainën janë tre vendet më të këqija për të bërë biznes në Europë, thotë dhoma europiane (EuCham), një institucion privat që përfaqëson interesin e kompanive të ndryshme europiane. Në indeks merren në analizë 46 shtete europiane, dhe vendi ynë figuron të jetë i 44-ti në renditje, më mirë vetëm se Ukraina, me 51 pikë të grumbulluara, dhe po aq pikë sa Bosnje Hercegovina.
Vitin e kaluar, Shqipëria renditej dy pozicione më lartë, e 42-ta, si dhe grumbullonte 53 pikë, duke lënë pas edhe Rusinë dhe Azerbajxhanin, veç Ukrainës dhe Bosnje Hercegovinës. Të dhënat e dhomës europiane bazohen kryesisht mbi indikatorë të tjerë, ai i Bankës Botërore në të bërit biznes si dhe në atë të Transparency International për perceptimin e korrupsionit.
Në të dy këta indikatorë vendi ynë ka humbur pozicione së fundmi, duke gjeneruar edhe rënien në indeksin e dhomës amerikane të vendeve më të mira europiane për të bërë biznes, ku Shqipëria radhitet në fund. Ky raport shërben si kartolina negative e radhës për Shqipërinë dhe përpjekjet e saj për të qenë tërheqëse përballë investitorëve të huaj.