“Shkëmbim kulturor dhe vullnetarizëm”. Kështu e ka cilësuar kryebashkiakja e Libohovës Luiza Mandi kontributin e një grupi nxënësish nga Belgjika, të cilët gjatë qëndrimit në Libohovë, kontribuan për kopshtin e fëmijëve. Ata kanë bërë piktura dhe disa ndërhyrje rikonstruktuese të vogla.
Por fotot e postuara nga vetë kryebashkiakja, tregojnë më së miri gjendjen e shëmtuar të këtij institucioni arsimor parashkollor.
Mirëmbajtja e institucioneve arsimore është detyrë dhe përgjegjësi e drejtpërdrejtë e bashkive. Faktet e ofruara nga vetë Bashkia dëshmojnë më së miri lënien pas dore të këtyre institucioneve.
U deshën disa nxënës nga Belgjika që në kopshtin e fëmijëve në Libohovë të vihej dorë.
Krahas vlerësimit dhe falenderimit për kontributin e nxënësve, që me dëshirën e tyre të mirë i dhanë një pamje të re këtij kopshti, ku vogëlushët kalojnë një pjesë të mirë të ditës, vjen edhe pyetja “Ku ka qenë Bashkia e Libohovës deri tani?”
A është vërtet kaq e vështirë saqë lyerja dhe suvatimi i mureve të mos bëhet dot nga bashkia?
Ku shkojnë fondet e mirëmbajtjes për institucionet në varësi të bashkisë?