Lëvizja studentore në Shqipëri në fillim të 1991, ka prekur në atë periudhë edhe Institutin e Lartë Pedagogjik sot Universiteti “Eqrem Cabej” në Gjirokastër.
Në atë periudhë dhjetëra studentë u solidarizuan me lëvizjen studentore të kryeqytetit duke u frymëzuar nga kauza e drejtë për vendosjen e demokracisë duke shembur fillimisht simbolet e diktaturës komuniste.
Pas rrëzimit të monumentit të diktatorit Enver Hoxha më 20 shkurt 1991 në kryeqytet, dy ditë më pas, studentë madje dhe disa pedagogë në Universitetin e Gjirokastrës, hoqën bustin e diktatorit Enver Hoxha i cili qëndronte në hollin hyrës të godinës universitare.
Ky veprim acaroi mjaft forcat e Sigurimit të Shtetit të cilat u vendosën në lëvizje për të zbuluar studentët që ndërmorën këtë akt. Në ndihmë të tyre erdhën edhe vullnetarët e Enverit të cilët me dhunë rivendosën bustin e hequr nga studentët guximtarë të asaj dite.
28 vjet më pas ky veprim kurajoz, do të përkujtohet nesër dt 22 shkurt nga protagonistët e asaj dite.
Aktiviteti i nesërm që organizohet në Hotel Cajupi, ndërmerret në kuadrin e “Ditëve të Kujtesës”, me mbështetjen e Fondacionit gjerman “Konrad Adenauer”, si dhe të ISP dhe me mbështetjen e CRD (Center for Regional Development).
Në këtë aktivitet nderon me pjesmarrjen e tij drejtori i Fondacionit “Konrad Adenauer” Walter Gloss, si dhe me pjesmarrjen e cmuar të Mark Marku, Afrim Krasniqi, Agron Gjekmarkaj, Çelo Hoxha, Sadik Bejko dhe protagonistët e asaj kohe.
Pjesmarja në këtë aktivitet është e lirë dhe mund të ndiqet nga cdokush.
