Basha takon kryeministrin kroat: E njoha me planin e PD për integrim në BE, do na mbështesë!

0
179

Kreu i Partisë Demokratike, Lulzim Basha ndodhet në një vizitë zyrtare në Kroaci, ku edhe ka takuar kryeministrin kroat Andrej Plenkoviç, ministrin e Punëve të Jashtme dhe atë të Punëve të Brendshme të Republikës së Kroacisë.

Në një video të publikuar në Facebook, Basha shpjegon se e ka njohur Plenkoviç me platformën e PD për integrimin në BE, ku sipas tij, ky i fundit i ka shprehur mbështetje në rrugën e integrimit Europian.

Kryedemokrati theksoi se Kroacia ka një eksperiencë shumë të mirë dhe në fushën e turizmit, dhe ky do ketë dhe prioritet i qeverisë së tij nëse vjen në pushtet, për të sjellë rritje ekonomike dhe punësim për qytetarët.

Deklarata e plotë:

Dua ta falënderoj kryeministrin e Kroacisë, Andrej Plenkoviç për pritjen miqësore që më rezervoi së bashku me ministrin e Jashtëm dhe të Brendshëm të qeverisë së Republikës së Kroacisë.

Për mua dhe për Partinë Demokratike, nuk ka asgjë më të rëndësishme se sa përshpejtimi i rrugëtimit europian të Shqipërisë pas ngecjes në vendnumëro gjatë 8 viteve të këtij procesi.

Për këtë arsye ne do të bëjmë gjithçka për ta bërë realitet këtë ëndërr të shqiptarëve. Kjo ka qenë në qendër të bisedës që kam zhvilluar me mikun tim, kryeministrin e Kroacisë, Andrej Plenkoviç.

Ashtu siç bashkëpunuar gjatë procesit të anëtarësimit të Shqipërisë dhe Kroacisë në NATO, ashtu do të bashkëpunojmë ngushtësisht edhe në procesin e anëtarësimit të Shqipërisë në BE. Në këtë kuadër, përvoja dhe ndihma e Kroacisë që është dhe vend anëtar i BE, është shumë e vyer për ne.

Jam i lumtur të ndaj me ju angazhimin e kryeministrit Plenkoviç për të na ndihmuar në këtë proces qoftë me mbështetje politike në tryezën vendimmarrëse të BE, siç bëri gjatë Presidencës kroate, kështu edhe në nivelin teknik që të jemi sa më të përgatitur e të ecim sa më shpejt në këtë proces.

E njoha kryeministrin Plenkoviç me platformën tonë të integrimit dhe me vullnetin dhe vendosmërinë tonë për të bërë të gjitha detyrat që do të çojnë në nisjen e bisedimeve me Bashkimin Europian dhe thithjen e fondeve për vendet aspirante, përmes të cilave ne do të zhvillojmë dhe modernizojmë ekonominë e vendit dhe do ju vijmë në ndihmë veçanërisht të rinjve, biznesit të vogël e të mesëm dhe fermerëve shqiptarë.

Unë jam i bindur se do të ja dalim siç bëmë Shqipërinë anëtare të NATO-s, siç liberalizuam vizat, hoqëm vizat për shqiptarët, do të bëjmë realitet edhe Shqipërinë europiane me ndihmën e BE dhe vendeve anëtare duke përfshirë këtu Kroacinë mike dhe aleate.

Së fundmi, Kroacia ka një eksperiencë shumë të mirë edhe në fushën e turizmit, një prioritet i qeverisë time nesër, dhe për këtë ne do të bashkëpunojmë ngushtësisht për të marrë modelet më të mira të zhvillimit që do të sjellin rritje ekonomike dhe punësim për qytetarët tanë. 

LEAVE A REPLY

Please enter your comment!
Please enter your name here