Kërcënimi i Prokurorit të Përmetit/ Gjonaj: Më shumë mbrojtje e mbështetje të gjithë magjistratëve

Ministrja e Drejtësisë, Etilda Gjonaj ka reaguar lidhur me rastin e raportuar në media të kërcënimit të Prokurorit të Përmetit, Asllan Bajrami.

Gjonaj theksoi se fuqizimi përmes Komisionit të Mbrojtjes së Prokurorëve dhe Gjyqtarëve, do të duhet të vijojë më tej, duke u dhënë më shumë mbështetje e mbrojtje të gjithë magjistratëve.

“Jam një ndër mbështetësit tuaj, në çfarëdolloj situate që do të keni, me qëllim që të ushtroni me përgjegjshmëri detyrën tuaj. Janë raste fatkeqe që dëgjon si rasti i Përmetit, i prokurorit të Përmetit kërcënimet që marrin. Prandaj edhe fuqizimi përmes Komisionit të Mbrojtjes së Prokurorëve dhe Gjyqtarëve, do të duhet të vijojë më tej, duke u dhënë më shumë mbështetje e mbrojtje të gjithë magjistratëve, të cilët ndihen të rrezikuar për shkak të detyrës nga faktorë të ndryshëm”, tha Gjonaj.

Deklarata e ministres u bënë gjatë një takimi në Shkodër, së bashku me përfaqësuesen e UNDP-së në Shqipëri, Limya Eltayeb, ambasadorin austriak Christian Steiner dhe drejtuesen e Zyrës Qendrore të Agjencisë Austriake për Zhvillim, Simone Ungerzboeck.

Prokurori i Përmetit, Asllan Bajrami është kërcënuar në krye të detyrës, teksa i është vendosur një fishek në dritaren e zyrës së tij. Policia ka nisur hetim për këtë ngjarje.

SHPËRNDAJE

Shkruaj nje koment