Deri më tani ishte menduar se anëtarët e Bashkimit Europian janë të shqetësuar vetëm për çështjen e Saimir Tahirit.
Por tashmë duket se në qendër të vëmendjes është edhe historia e vëllait të ministrit aktual të Brendshëm, Fatmir Xhafajt.
Gazeta më e madhe holandeze, “De Telegraaf” e bën të ditur këtë në një shkrim në lidhje me vizitën e një delegacioni holandez në Tiranë.
Gazeta i referohet sulmeve të kryeministrit Edi Rama ndaj këtij delegacioni.
Por edhe pse Rama thotë se holandezët nuk janë informuar për gjysmë dite vizitë në Shqipëri, duket se ata i dinë gjërat pasi janë të shqetësuar edhe për largimin e Besim Hajdarmatajt.
Ata i përgjigjen indirekt edhe kreut të Kuvendit, Gramoz Ruçi, që tha se Shqipëria ka tre përfaqësues në Eurovizion dhe personazhe të njohur në futbollin europian.
‘Në delegacionin holandez ka shqetësime të mëdha për lajmet e fundit nga Shqipëria dhe kjo ka të bëjë pak me futbollin dhe këngët. Prokurori që shqyrtoi një ish-ministër, u mënjanua.
Vëllai i një ministri, që është dënuar në Itali për trafik droge, nuk po ekstradohet, sipas mediave vendase. Qeveria holandeze më parë ka treguar se Shqipëria nuk është gati për pranim’.
Menjëherë pas largimit të misionit faktmbledhës të 8 deputetëve holandezë që përfaqësojnë 7 partitë kryesore parlamentare në këtë vend, fillimisht kreu i Kuvendit dhe më pas edhe vetë kryeministri Rama, kanë nisur një sulm denigrues deri edhe tallës ndaj tyre. Gramoz Ruçi i akuzoi se farën e kanabisit dhe drogën, shqiptarët e kanë mësuar prej tyre, kurse kryeministri shkoi edhe më tej me cinizmin e tij duke i përqeshur.
“Më vjen për të qeshur kur vijnë delegacione me “fact-finding” (faktmbledhëse). Vijnë në mëngjes dhe ikin pasdite për të mbledhur fakte. Më takojnë mua, takojnë ca deputetë. Takojnë edhe mikun tim të shtrenjtë, me të cilin na bashkon, sigurisht në mënyra të ndryshme dashuria për Holandën, Lulzim Bashën dhe largohen. Dhe mbledhin fakte. Çfarë lloj faktesh mund të mblidhen brenda gjysmë dite?”, deklaroi para pak ditësh Edi Rama.
Por gazeta më e madhe në Holandë “De Telegraaf”, nuk e ka lënë me kaq këtë sulm të krerëve të Rindjes në Shqipëri kundër deputetëve holandez. Ajo i ka kushtuar një shkrim deklaratave të fundit të kryeministrit Edi Rama dhe Kryetarit të Kuvendit Gramoz Ruci, duke cituar njëkohësisht edhe kryetarin e delegacionit parlamentar të vendit të tyre që vizitoi Tiranën.
Në shkrim thuhet se shqetësimi i holandezëve gjatë vizitës në Tiranë ishin ndryshimet e fundit në prokurori, që lidhen me çështjen e ish-ministrit Tahiri, si dhe raportimet e mediave shqiptare për mos ekstradimin e vëllait të ministrit Xhafajt.
Gjithashtu theksohet se qeveria holandeze edhe më herët se të ndodhnin zhvillimet e fundit në Tiranë ka deklaruar, se Shqipëria nuk është gati të anëtarësohet në BE, për arsye të ekspansionit të krimit të organizuar në qeverisje dhe korrupsionit galopant.
Në përgjigje të sulmeve të kryeministrit Rama, kryetari i delegacionit të grupit parlamentar holandez Malik Azmani, tha për gazetën “De Telegraaf” se: “Siç duket kemi shkelur tek diçka e ndjeshme në Shqipëri me pyetjet tona, gjithsesi i kemi mbajtur të gjitha shënim”.
