Ruajtja e detit Adriatik nga ndotja dhe çështjet ekologjike janë kushte të rëndësishme për rrugën e Shqipërisë drejt Bashkimit Evropian. Kështu u shpreh ministrja kroate e Punëve të Jashtme dhe Europës Marija Pejcinovic Buric gjatë takimit zyrtar me Ministrin e Jashtëm Ditmir Bushati, mesin e javës së kaluar.
“Ne kemi një det që ka nevojë për ne”, u shpreh ministrja kroate duke deklaruar se deti Adriatik ka mundësi të mëdha për zhvillimin e turizmit.
Ajo theksoi se Shqipëria duhet të ndalojë ndotjen e detit Adriatik dhe shprehu shqetësimin e saj për ndotjen që i vjen Kroacisë nga ky det.
Ministrja Buric u shpreh se marrëdhëniet ndërmjet dy vendeve duhet të forcohen më tej përmes investimeve në transportin rrugor dhe ajror si dhe në energji. Ndërsa për korridorin lidhës Adriatik- Jon ajo theksoi se Kroacia e ka ndërtuar tashmë pjesën e saj.
