Moska sulmon Kievin gjatë vizitës së shefit të OKB-së, rusët shtrijnë kontrollin në Kherson

0
67

Zyrtarët ukrainas kanë dënuar sulmin me raketa të Rusisë në Kiev, që ndodhi mbrëmjen e djeshme, teksa Sekretari i Përgjithshëm i Kombeve të Bashkuara Antonio Guterres po përfundonte një vizitë në kryeqytetin ukrainas.

Presidenti Volodymyr Zelensky tha se “raketat ruse fluturuan në qytet” menjëherë pas përfundimit të bisedimeve me Guterres në Kiev. Dmytro Kuleba, ministri i Punëve të Jashtme të Ukrainës, i quajti sulmet me raketa një “akt të urryer barbarie”.

OKB-ja po bën thirrje për korridore evakuimi në qytetin e rrethuar të Mariupol. Forcat ruse kanë bërë njëfarë përparimi në Ukrainën lindore, sipas zyrtarëve të SHBA-së dhe NATO-s, ndërsa ushtria e tyre përpiqet të rregullojë problemet e panumërta që pllakosën javët e para të pushtimit.

Shtetet e Bashkuara kanë parë “disa prova” të përmirësimit në aftësinë e Rusisë për të kombinuar operacionet ajrore dhe tokësore, si dhe kapacitetin e saj për të rifurnizuar forcat në terren, thonë zyrtarët.

Zelensky tha se 10 anëtarë të shërbimit rus janë identifikuar si të dyshuar në “krimet e kryera kundër popullit tonë në Bucha.” Hetimi për krimet e kryera nga ushtria ruse është duke u zhvilluar, tha Zelensky.

Forcat pushtuese ruse në rajonin jugor të Ukrainës, Kherson, po përpiqen të shtrijnë kontrollin e tyre mbi këtë zonë. Ditët e fundit rusët kanë emëruar zyrtarët e tyre për të drejtuar Kherson, duke zëvendësuar zyrtarët e zgjedhur ukrainas.

Të enjten, një nga ata zyrtarë të sapo instaluar tha se Kherson do të fillojë të përdorë rublën nga java e ardhshme, duke zëvendësuar monedhën ukrainase, hryvnia. Për më tepër, kanalet televizive ruse kanë zënë vendin e rrjeteve ukrainase.

Administrata Biden po i dërgon Kongresit një kërkesë shtesë prej 33 miliardë dollarësh për financim që synon të mbështesë Ukrainën përmes një faze të re gjatë disa muajve të ardhshëm. Ai përfshin financimin për sigurinë, ndihmën ekonomike dhe humanitare. “Ne kemi nevojë për këtë projektligj për të mbështetur Ukrainën në luftën e saj për liri,” tha Biden.

Burimi: CNN

Shkruaj nje koment