Nga Kastriot Islami
Menaxhimi i pandemisë së COVID-19 nga “kompetenti virusolog i Surrelit” ka qenë diletant, pa strategji, pa program dhe pa profesionalizëm. Në mungesë të plotë transparence, në dhunim të rregullave minimale të një shteti ligjor dhe me një subjektivizëm e arrogancë ekstreme duke shkelur rëndë të drejtat themelore të qytetarëve. Gjithçka e bazuar në mashtrime e gënjeshtra, në formë e shfaqjeve teatrale nga Facebook-u i Surrelit, po ashtu si edhe qeverisja e tij 7-vjeçare… Me vjen keq të deklaroj një gjë të tillë kur formalisht për menaxhimin e saj kanë qenë të angazhuar për trajtimin e të sëmurëve edhe shumë mjekë e infermierë të talentuar që duhen përgëzuar për rolin, angazhimin dhe kontributin e tyre njerëzor e profesional dhe që nuk janë shpërblyer aspak nga qeveria. Shifrat statistikore dhe gjithçka i është bërë me dije publikut është bërë nga bunkeri i “kompetentit” të Surrelit. Në realitet, Rama e ka manipuluar gjatë të gjithë kohës kurbën e të infektuarve nga koronavirusi që nga dita e parë dhe vazhdon edhe sot e kësaj dite… Ka pasur dhe ka vetëm një qëllim maniakal, të mburret se ka qenë “kompetenti më i mirë në botë për menaxhimin e pandemisë”, prandaj Shqipëria është një “histori suksesi” për meritë të tij. Por në realitet, edhe përsa i përket menaxhimit të krizës sanitare, ashtu edhe të krizës ekonomike e sociale, Shqipëria është një “histori dështimi”. Madje Rama, me masat drastike të pashembullta për vendet demokratike europiane, jo vetëm dështoi në menaxhimin e krizës sanitare, por edhe e ka zhytur vendin në një krizë ekonomike nga më të rëndat në Europë, duke dhunuar si në asnjë vend tjetër edhe të drejtat themelore të njeriut. Ja ku bazohen këto përfundime:
Së pari , Shqipëria në datën 31 maj 2020 renditet:
-Në vendin e 93 përsa i përket numrit të të infektuar për 1 milion banorë, me 395 të infektuar për 1 milion shqiptarë, ndërkohë që 122 vende të tjerë kanë më pak të infektuar për 1 milion banorë. Nuk po vë në dukje se edhe kjo shifër prej 395 të infektuar për 1 milion shqiptarë është ulur nga Rama me shumë manipulime;
• Në vendin e 86 me 11 vdekje për 1 milion banorë, ndërkohë që 129 vende të tjerë kanë numër më të ulët vdekjesh për 1 milion banorë, edhe shifra 11 vdekje për 1 milion banorë është ulur me manipulime nga Rama.
Së dyti , nga opinionet e shumë ekspertëve të shquar shqiptarë dhe nga analiza profesionale të ekspertëve ndërkombëtarë, vendet e rajonit tonë rezultojnë me numër të ulët të numrit të të infektuarve dhe të vdekjeve nga COVID-19 për 1 milion banorë, për arsyet “objektive”:
-dendësia më e ulët e popullsisë;
-struktura moshore me shifër relative më të lartë të rinjve;
-me numër të ulët ose zero të të moshuarve të grumbulluar (azilet e të moshuarve);
-klima mesdhetare e favorshme kundër përhapjes së virusit;
-komunikim më pak intensiv me vendet e zhvilluara dhe brenda vendit;
-imunitet i krijuar nga një pjesë e popullsisë, kryesisht të moshuar, për shkak të mënyrës së jetesës;
-imunitet i krijuar për shkak të vaksinimeve kundër tuberkulozit, malaries, e tjerë…
Së treti, mburrja e mashtrimet e Ramës se Shqipëria është një Histori Suksesi për shkak të masave drastike që ai deklaronte me ulërima, është një blof që askush nuk e beson për më tepër që teza e tij është hedhur poshtë nga mbajtësi i çmimit Nobel, Micheal Levitt, një profesor britaniko-amerikan-izraelit, i cili ka deklaruar: “…karantinat nuk kanë shpëtuar asnjë jetë nga COVID-19. Ndoshta mund të kenë shpëtuar disa jetë në aksidentet rrugore dhe të ngjashme, por dëmi social nga abuzimi në familje, divorci, alkoolizmi qe ekstrem, plus ata që nuk u mjekuan për sëmundje të tjera ishte i konsiderueshëm…”.
Së fundmi, për t’i vënë vulën këtyre mburrjeve të trasha të Ramës e madje për të provuar të kundërtën, le t’i referohemi një parametri tjetër, që tregon se në çfarë niveli është përhapja/transmetimi i virusit gjatë këtyre ditëve të fundit në Shqipëri, krahasuar me vendet e rajonit e ato fqinje, Kosovë, Maqedoni e Veriut, BiH, Greqi, Kroaci, Itali dhe Serbi. Po t’i referohemi të dhënave për R-efektive (parametër që mat në çfarë niveli transmetohet koronavirusi) nga Universiteti i Gjenevës dhe Qendra e të Dhënave Shkencore në Cyrih të Zvicrës rezulton se Shqipëria është e fundit mes të gjithë këtyre vendeve, sepse ajo ka vlerën mesatare më të lartë të R-efektive në 15 ditët e fundit, prej 1,34 (shih tabelën).
Si përfundim , shqiptarët duhet të mësojnë se për shumë arsye, historike, sociale, gjeografike, gjenetike e tjerë të përmendura më sipër, vendet e rajonit tonë renditet në mesin e listës prej 215 vendeve të prekura nga COVID-19 si përsa i përket vlerave të infeksionit ashtu edhe shifrës së vdekjeve. Thënë ndryshe, shqiptarët edhe në sajë të reagimit të tyre të përgjegjshëm kanë qenë të favorizuar objektivisht nga kjo pandemi e rrezikshme krahasuar me vendet e zhvilluara të Europës Qendrore që kanë pasur rreth 10-50 herë më shumë të infektuar e vdekje sesa vendi ynë, ndonëse ne kemi pasur shifra dhjetëra herë më të larta se ato të vendeve afrikane… Ndonëse vendet e zhvilluara janë shumë më të pajisura me mjete e personel dhe me më shumë mjete financiare. Prandaj as që mund të bëhet fjalë se këto shifra janë më të ulëta se ato në Perëndim për meritë të Ramës. Madje mund të thuhet se për shkak të keqmenaxhimit të pandemisë nga Rama, Shqipëria, krahasuar me vendet e rajonit, fatkeqësisht gjendet në vendin e fundit dhe po kalon aktualisht një situatë problematike e të rënduar të transmetimit të virusit!!… Kurse situata ekonomike e sociale për shkaqe të lidhura kryesisht apo vetëm me keqqeverisjen e pandemisë është katastrofike dhe efektet e saj do të ndihen të rënda në javët e muajt në vijim.
