Parlamenti Europian miraton progres raportin për Shqipërinë: BE të nisë bisedimet e anëtarësimit

Në një raport që vlerëson progresin e Shqipërisë drejt anëtarësimit në BE në vitin 2021, eurodeputetët nga Komiteti i Punëve të Jashtme vlerësojnë orientimin strategjik dhe angazhimin e Shqipërisë për integrimin evropian.

Ata shprehin mbështetjen e tyre për transformimin demokratik të vendit dhe aspiratën për anëtarësim në BE.

“Eurodeputetët shprehin keqardhje për dështimin e hapjes së negociatave të anëtarësimit të vonuara me Shqipërinë dhe Maqedoninë e Veriut, duke theksuar solidaritetin dhe simpatinë e plotë me qytetarët e këtyre vendeve. Ky dështim minon qëndrimet e publikut ndaj BE-së dhe është një rrezik serioz për politikën e zgjerimit të BE-së në tërësi, sipas raportit. Eurodeputetët theksojnë se të dyja vendet kanë përmbushur kushtet e vendosura nga Këshilli Evropian”, thuhet në raport.

Eurodeputetët i kërkojnë Shqipërisë të vazhdojë dhe të intensifikojë përpjekjet e saj për të përforcuar funksionimin e gjyqësorit, për të forcuar demokracinë, shtetin e së drejtës dhe ekonominë. Vendi ynë gjithashtu duhet të fuqizojë shoqërinë civile, të luftojë korrupsionin dhe krimin e organizuar, të sigurojë lirinë e medias dhe të garantojë mbrojtjen e të drejtave të pakicave, duke përfshirë komunitetin LGBT.

Raporti i bën thirrje BE-së të “vlerësojë në mënyrë kritike implikimet historike të sigurisë për stabilitetin dhe unitetin në kontinentin evropian dhe në Ballkanin Perëndimor në kontekstin e agresionit rus kundër Ukrainës”. Ai u k

ërkon shteteve anëtare të demonstrojnë unitetin evropian duke nisur zyrtarisht negociatat e anëtarësimit me Maqedoninë e Veriut dhe Shqipërinë, duke marrë parasysh si implikimet gjeopolitike të vendimit ashtu edhe përmbushjen e kritereve zyrtare nga të dy vendet.

Raportuesja Isabel Santos (S&D, PT) tha: “Shqipëria mbetet një partner strategjik plotësisht i besueshëm dhe i përkushtuar. Ajo vazhdon të ecë përpara me reformat themelore të BE-së dhe po përmbush dhe ruan kushtet për fillimin e bisedimeve të anëtarësimit. Është e drejtë që Këshilli më në fund të bie dakord për hapjen e negociatave të anëtarësimit të vonuara me Shqipërinë, jo më pak përballë sfidave gjeostrategjike në rritje”.

Shqipëria është një vend kandidat që nga viti 2014 dhe Komisioni ka rekomanduar fillimin e bisedimeve të anëtarësimit që nga viti 2018. BE mbetet deri tani partneri më i madh tregtar dhe investues dhe ofruesi më i madh i ndihmës financiare për Shqipërinë. Pas votimit të komisionit, raporti do të hidhet për votim në seancën plenare të 18-19 majit.

SHPËRNDAJE

Shkruaj nje koment