Partia Demokratike do të mbledhë të enjten në 15 korrik Kryesinë.
Në këtë mbledhje, sipas mesazhit të Sekretarit të Përgjithshëm të PD, Gazmend Bardhi për demokratët në rend dite do jete shqyrtimi i analizës së masakrës zgjedhore të 25 Prillit për fazën e parë, do miratohen Komisionet e votimit për zgjedhjen e anëtarëve të Këshillit Kombëtar, shqyrtimi i ndryshimeve në Statutin e Partisë Demokratike, ndërsa Basha do të njoftojë listën me emrat për Këshillin Kombëtar që do votohen në 17 korrik.
Po ashtu, të mërkurën do zhvillohet mbledhja e Komisionit të Përhershëm Statutor për propozimet.
Mesazhi i Bardhit:
Të nderuar anëtarë të Kryesisë,
Ditën e enjte, datë 15.07.2021, ora 18:00 do të zhvillohet mbledhja e Kryesisë së Partisë, me këtë rend dite:
1. Shqyrtimi i përmbledhjes së analizës së masakrës zgjedhore të 25 Prillit, për fazën e parë të saj.
2. Shqyrtimi i ndryshimeve në Statutin e Partisë Demokratike që do ti propozohen për miratim Kuvendit Kombëtar të Partisë, në mbledhjen e tij të datës 17 Korrik 2021.
3. Miratimi i urdhrit për ngritjen e Komisioneve të Votimit dhe Numërimit për zgjedhjet e anëtarëve të Këshillit Kombëtar në mbledhjen e datës 17 Korrik 2021 të Kuvendit Kombëtar.
4. Njoftimi nga Kryetari i Partisë i listës që do të propozojë për votim për kandidatët për anëtar të Këshillit Kombëtar.
Të mërkurën, datë 14.07.2021, orën 11:00, do të zhvillohet mbledhja e Komisionit të Përhershëm Statutor, për të shprehur mendimin e tij për propozimet që do të vijnë deri të martën, datë 13.07.2021, nga anëtar të Komisionit, anëtar të Kryesisë, Kryetari i Partisë, anëtar të Këshillit Kombëtar, apo strukturat lokale të Partisë.
Duke ju uruar punë të mbarë!
