Raporti alarmues i OKB-së: 7 milionë fëmijë në botë nuk janë të lirë, shumë prej tyre janë në kampe

0
52

Rreth shtatë milionë fëmijë në vit nuk janë të lirë, pasi ata mbahen në burgje, paraburgim, qendra për ndalimin e migracionit, shtëpi për persona me aftësi të kufizuara ose institucione të mirëqenies, thuhet në një studim të Kombeve të Bashkuara për të drejtat e njeriut.

Sipas autorëve, ky vlerësim bie në kundërshtim me Konventën e të Drejtave të Fëmijëve, që është një pakt i nënshkruar nga afro 200 vende të botës dhe që e lejon ndalimin nën moshën 18-vjeçare vetëm si masë afatshkurtër.

“Edhe pse është arritur përparim viteve të fundit për zgjidhjen e problemit, duhet të bëhet shumë më tepër për t’i nxjerrë fëmijët nga institucionet [e ndalimit] dhe për t’i dhënë fund ndalimit të emigrantëve nën moshë”, tha Manfred Nowak, studiues austriak i të drejtave të njeriut, njëherësh udhëheqës i studimit. OKB thotë se një fëmijë emigrant vdes çdo ditë në botë. Ekipi i Nowak-ut zbuloi se të paktën 410,000 fëmijë mbahen çdo vit në burgje dhe paraburgim, ndërsa 1 milion mbahen në arrest policor.

Për më tepër, 80 vende i kanë të ndaluar 330,000 fëmijë emigrantë, thuhet në raport. “Rreth 5.4 milionë fëmijë të tjerë jetojnë në institucione të mirëqenies, të cilat për nga natyra e tyre, nuk janë në gjendje të operojnë pa i privuar fëmijët nga liria”, thekson po ashtu raporti.

Ekspertët e të drejtave të njeriut analizuan në mënyrë të veçantë zonat e konfliktit, si Siria dhe Iraku, ku mijëra fëmijë të ekstremistëve të supozuar të grupit Shteti Islamik thuhet te mbahen neper kampe, e mes tyre, ka edhe dhjetëra të mitur shqiptarë.

Shkruaj nje koment