Raportuesit e KE: Korrupsioni në Shqipëri mbetet problem, shqetësues mjedisi mediatik

Pas vizitës së tyre në Tiranë nga data 29 qershor deri më 1 korrik 2022, bashkë-raportuesit e Asamblesë Parlamentare të Këshillit të Evropës (PACE) për monitorimin e detyrimeve dhe angazhimeve nga Shqipëria, Joseph O’Reilly (Irlandë, EPP/CD) dhe Asim Mollazada (Azerbajxhan, KE/DA), përshëndetën progresin e shënuar në lidhje me reformën në drejtësi dhe luftën kundër korrupsionit, por theksuan nevojën e zbatimit të qëndrueshëm për të prodhuar rezultatet e prekshme që priten nga shoqëria shqiptare.

Bashkë-raportuesit përshëndetën veçanërisht zgjatjen e fundit të mandatit të organeve për vettingun e gjyqësorit të Shqipërisë, pasi numri i lartë i shkarkimeve nga vetingu nënvizon nevojën e vazhdueshme për këtë procedurë.

Ata gjithashtu vlerësuan faktin që organet speciale për të luftuar korrupsionin dhe krimin e organizuar tashmë janë krijuar plotësisht dhe funksionale, gjë që raportuesit shpresojnë se tani do të rezultojë në një rritje të dukshme të aktakuzave dhe dënimeve për – veçanërisht të nivelit të lartë – korrupsion.

“Fakti që Shqipëria ka ende rezultate shumë të ulëta në Indeksin e Perceptimit të Korrupsionit të Transparency International dhe madje ka zbritur në renditje në vitin 2021, nënvizon këmbënguljen e korrupsionit në Shqipëri dhe nevojën që të gjithë aktorët të shtojnë përpjekjet e tyre në luftën kundër këtij kërcënimi për funksionimin e Institucionet demokratike të Shqipërisë”, theksuan bashkë-raportuesit.

Pavarësisht progresit të vazhdueshëm në lidhje me funksionimin e institucioneve demokratike, mjedisi mediatik mbetet një burim shqetësimi për raportuesit. Në të njëjtën kohë, ata u kërkuan mediave shqiptare të krijojnë një sistem të duhur të mekanizmave vetërregullues për të forcuar raportimin etik.