Qeveria Shqiptare në pamundësi për ta zgjidhur vetë situatën e tërmeteve të rëna ditë më parë ka kërkuar ndihmën e shteteve fqinje. Në përgjigje të thirrjes së Autoriteteve shqiptare, ka qenë Republika e Greqisë ajo që do të na vijë në ndihmë për përballimin e pasojave dhe lehtësimin e të dëmtuarve prej tërmeteve dhe përmbytjeve që goditën së fundmi Shqipërinë. Ndihma humanitare greke përfshihet në kuadrin e Mekanizmit Europian të Mbrojtjes Civile, një instrument që koordinon përballimin kolektiv europian të fatkeqësive natyrore. Mbërritja e ndihmave është parashikuar për ditën e sotme në aeroportin ndërkombëtar të RINAS-it të Tiranës. Pritet që avioni i transportit të Aviacionit Luftarak Grek, të sjellë në Shqipëri gjeneratorë, ushqime, ilaçe, tenda, krevate, batanije dhe materiale të tjera të nevojshme. Të shtunën e kaluar, vendi ynë u trondit nga tri tërmete të fuqishme, mes të cilëve njëri ka qenë me magnitude 5.8 Rihter dhe intensitet mbi 7.5 ballë, i lokalizuar 30 km në veri të qytetit të Durrësit. Sipas IGJEUM-it, ky është tërmeti më i forti i shënuar në vend në harkun e 20-30 vjetëve të fundit. Tërmetet shkaktuan dëme të mëdha materiale, si dhe mbi 85 të plagosur. Ndërkohë lëkundje të tjera tërmeti me një magnitudë në zbritje janë ndjerë edhe përgjatë kësaj jave. Më herët, u regjistrua një tjetër tërmet me epiqendër në detin Adritiatik, 6 kilometra në veri të Durrësit.Tërmeti ishte me magnitudë 3.1 me një thellësi prej 10 kilometrash.
