Skandali me të dhënat, Meta në krah të Konfindustrisë: Të pezullohet përkohësisht fiskalizimi

0
153

Presidenti Ilir Meta ka mbështetur nismën e Konfindustrisë për pezullimin e përkohshëm të procesit të fiskalizimit të detyrueshëm për bizneset.

Meta bën me dije se kjo masë do të jetë në fuqi deri në dhënien e sigurive të plota teknike e ligjore nga shteti shqiptar për mbrojtjen e të dhënave tregtare e bizneseve.

Presidenti thekson se skandali i rrjedhjes së të dhënave personale, tregon problematikat e shumta të sigurisë së rrjeteve të informacionit.

Madje ai u tërheq vëmendjen institucioneve shtetërore në rastin e ngjashëm të mundshëm të rrjedhjes së të dhënave masive, nga procesi i fiskalizimit, pasojat mund të jenë të rënda për mbi 120 mijë biznese.

Po ashtu, Meta mbështet ngritjen e komisionit hetimor parlamentar për nxjerrjen e plotë dhe marrjen e përgjegjësive penale dhe financiare të institucioneve shtetërore dhe kompanive private, lidhur me skandalin e rrjedhjes në publik të të dhënave personale.

Meta: Pasi jam njohur zyrtarisht, si dhe duke vlerësuar interesin e madh publik, kushtetues, sigurisë kombëtare dhe përgjegjësive euroatlantike të vendit, mbështet nismën e Konfindustrisë për pezullimin e përkohshëm të procesit të fiskalizimit të detyrueshëm për bizneset, deri në dhënien e sigurive të plota teknike dhe ligjore nga shteti shqiptar për mbrojtjen e të dhënave tregtare të bizneseve. Skandali i rrjedhjes së të dhënave personale të qindra mijë qytetarëve shqiptarë në dhjetor 2021 drejtpërdrejt nga agjensia shtetërore përgjegjëse AKSHI, tregon problematikat e shumta të sotme të sigurisë së rrjeteve të informacionit.

U tërheq vëmendjen institucioneve shtetërore, që në rastin e ngjashëm të mundshëm të rrjedhjes së të dhënave masive të siguruara në kohe reale nga procesi i fiskalizimit me detyrim edhe nga dhjetëra kompani private ndërmjetëse, pasojat do të jenë shumë më të rënda sesa të skandalit të dhjetorit 2021. Në ketë rast pasojat do të jenë të rënda për mbi 120 mijë biznese, që rrezikohen nga penalizime gjyqësore në vlera të jashtëzakonshme për shtetin shqiptar, goditje në afatgjatë për ekonominë dhe deri në cenim të sigurisë kombëtare dhe rendit kushtetues. Mbështes gjithashtu kërkesën për ngritjen e komisionit hetimor parlamentar për nxjerrjen e plotë dhe marrjen e përgjegjësive penale dhe financiare të institucioneve shtetërore dhe kompanive private, shkaktarë të skandalit të rrjedhjes në publik të të dhënave personale të qytetarëve dhe bizneseve në dhjetor 2021.

LEAVE A REPLY

Please enter your comment!
Please enter your name here