Një ngjarje e rëndë është shënuar pasditen e sotme në Tiranë.
Dy të mitur janë mbytur në liqenin e Prushit.
“Sot, rreth orës 18:05, në liqenin e Prushit, janë mbytur dy të mitur të moshës 11 dhe 13 vjeç.
Me marrjen e njoftimit, shërbimet e Policisë kanë shkuar menjëherë në vendngjarje dhe kanë nisur kërkimet.
Njëkohësisht drejt vendngjarjes janë nisur edhe polumbarët e Reneas, për të bërë të mundur gjetjen e trupave të dy të miturve”, njoftoi policia fillimisht,
Mësohet se 6 fëmijë ishin duke u larë në liqen në afërsi të Vaqarrit, por fatkeqësisht këtë pasdite dy prej tyre, vëllezër me njëri -tjetrin nuk arritën të dalin më të gjallë prej ujit.
Dyshohet se vëllai i madh u fut në ujë për të shpëtuar vëllain e vogël, por humbën jetën të dy.
Polumbarët e Reneas nisën kërkimet dhe arritën të gjejnë trupat e fëmijëve rreth dy orë pas ngjarjes tragjike.
Grupi hetimor po punon për zbardhjen e plotë të rrethanave të ngjarjes.
