Lista prioritare me 57 gjyqtarët dhe prokurorët, të cilët po i nënshtrohen Vetingut, po shkon drejt shterrimit. Nga grupi i parë prioritar kanë mbetur më pak se 10 subjekte për t’u verifikuar.
Komisioni i Pavarur i Kualifikimit, organi bazë i Vetingut, ka përcaktuar me anë të shortit një tjetër listë me 108 gjyqtarë dhe prokurorë, të cilët do të verifikohen për ligjshmërinë e pasurive, kontaktet e mundshme dhe krimin dhe aftësitë profesionale.
Pjesë e listës së dytë janë edhe drejtuesit e gjykatave të shkallës së parë dhe të Apelit të Gjirokastrës e Përmetit, Gjykatës Administrative të Gjirokastrës.
Vetingut do t’i nënshtrohen në ditët dhe javët në vijim edhe dy drejtuesit e Prokurorisë së Gjirokastrës dhe Përmetit.
Ligji i Vetingut ka përcaktuar si prioritet për t’ju nënshtruar fillimisht Vetingut anëtarët e Gjykatës së Lartë, Gjykatës Kushtetuese dhe më tej njerëzit e tjerë drejtësisë sipas rëndësisë.
Ja lista e gjykatësve dhe prokurorëve që operojnë në rajonin e Gjirokastrës që do t’i nënshtrohen Vetingut në ditët vijuese.
Enton Dhimitri, Gjykata e Apelit Gjirokastër, kandidat për KED
Pashk Gjaci, kryetar i Gjykatës së Rrethit Përmet
Ramiz Lala Kryetar i Gjykatës Administrative Gjirokastër
Dritan Banushi, kryetar i Gjykatës së Apelit Gjirokastër
Albina Spahaj, kryetare e Gjykatës së Rrethit Gjirokastër
Arben Pasho, Kryeprokuror i Gjirokastrës
Hysen Keta, drejtues i Prokurorisë së Rrethit Përmet
Alfred Agolli, drejtues, Prokuroria e Apelit Gjirokastër