Gorrica është një fshat që ndodhet në verilindje të Bashkisë së Këlcyrës. Në këtë fshat jetojnë gati 300 frymë shumica me probleme të forta sociale. Përpos kësaj, infrastruktura është mjaft e rënduar.
Qeveria nuk ka vënë dorë në rrugën që lidh fshatin me pjesën tjetër të zonës. Guret me diametër të ndryshëm bëhen shkak i aksidenteve në disa raste edhe me pasojë por deri më sot, askush nuk i ka dëgjuar hallet e këtij komuniteti i cili ndodhet i strukur dhe as nuk ka cuar ndonjëherë zë për problematikat me të cilat ndeshen. Banorët të ngarkuar me probleme të mëdha sociale dhe shëndetësore, kërkojnë të paktën, ridisiplinimin e rrugës e gjatë më pak se 1 km.
Terreni shumë i vështirë, favorizon aksidentet të cilat nuk kanë munguar, apo dhe dëmtimin e automjeteve të cilat guxojnë të sfidojnë. Kërkesa e tyre themelore dhe e vetmja është kjo rrugë.
Nuk kërkojnë as asfaltimin e saj dhe as vepra arti, thjesht hedhjen e cakullit dhe evadimin e shkëmbinjve anës dhe pranë saj. Sic e thonë edhe vetë banorët, premtimet e deputetëve të maxhorancës kanë qenë të shumta në raste fushatash elektorale, por sa kanë ardhur dhe marrë votën dhe më pas harrohen.